Լիանա Պետրոսյանը հմուտ հրուշակագործ է Ստեփանակերտից` Արցախից։ Ամուսնու հետ միասին նա կառուցել էր խաղաղ և լիարժեք կյանք՝ մեծացնելով իրենց հինգ երեխաներին։ Նրա ամուսինը աշխատում էր որպես սակրավոր The HALO Trust կազմակերպությունում, իսկ Լիանան վարում էր փոքր, բայց զարգացող հրուշակեղենի բիզնես։ Տնային պայմաններում սկսված գործը շուտով ընդլայնվեց, տեղափոխվեց վարձակալված արտադրամաս, որտեղ նրա ձեռագործ քաղցրավենիքները դարձան թե՛ վստահելի եկամտի աղբյուր, թե՛ ընտանիքի հպարտության առարկա։
Ամեն ինչ փոխվեց 2023 թվականի սեպտեմբերի 26-ին, երբ Ադրբեջանի ագրեսիան ստիպեց Լիանայի ընտանիքին՝ ինչպես հազարավոր այլ ընտանիքների, լքել իրենց տունը։ Երևանում կարճ, բայց դժվար ժամանակահատված անցկացնելուց հետո նրանք բնակություն հաստատեցին Գորիսում և սկսեցին կյանքը վերակառուցել զրոյից։ Լիանայի ամուսինը այժմ զբաղվում է բնակարանների վերանորոգմամբ և ինտերիերի ձևավորմամբ՝ մասնավոր կարգով, իսկ Լիանան գտավ ուժ՝ վերադառնալու իր սիրելի գործին։ Սկսելով կրկին իր խոհանոցից՝ նա վերսկսեց թխվածքների և քաղցրավենիքների պատրաստումը՝ աստիճանաբար վերականգնելով իր նպատակասլացությունն ու հույսը։
Նրա երազանքն է մի օր ձեռք բերել սեփական տուն, որտեղ սենյակներից մեկը կծառայի որպես հատուկ արտադրամաս և փոքրիկ խանութ իր հրուշակեղենի բիզնեսի համար։ Այժմ սպասելով իր վեցերորդ երեխային՝ Լիանան շարունակում է դիմակայել կյանքի մարտահրավերներին՝ ցուցաբերելով բացառիկ տոկունություն, լավատեսություն և վճռականություն։
«Ջինիշյան» հիշատակի հիմնադրամի ծրագրի աջակցությամբ (համաֆինանսավորվում է AmCham-ի կողմից) նա ստացել է անհրաժեշտ սարքավորումներ՝ ներառյալ խոհանոցային կոմբայն, սառնարան և վակուումային փաթեթավորման սարք՝ ինչը օգնում է նրան ընդլայնել արտադրությունը և ավելի մոտենալ իր նպատակին՝ ընտանիքի համար կայուն բիզնեսի վերականգնմանը։
